Exo 32 | NdeIBE | STEP | Kwathi lapho abantu bebona uMosi esephuzile ukwehla entabeni, babuthana ku-Aroni bathi kuye, “Lalela, senzele onkulunkulu abazahamba phambi kwethu, ngoba umuntu lo, uMosi owasikhupha elizweni laseGibhithe, asikwazi osekwenzakale kuye.”

Exodus 32

Ithole legolide

1 Kwathi lapho abantu bebona uMosi esephuzile ukwehla entabeni, babuthana ku-Aroni bathi kuye, “Lalela, senzele onkulunkulu abazahamba phambi kwethu, ngoba umuntu lo, uMosi owasikhupha elizweni laseGibhithe, asikwazi osekwenzakale kuye.”

2 U-Aroni wabaphendula wathi, “Khumulani amacici egolide asezindlebeni zamakhosikazi enu, amadodana enu lamadodakazi enu, liwalethe kimi.” 3 Ngakho abantu bonke bawakhumula amacici abo bawasa ku-Aroni.

4 Wathatha lokho abamnikeza khona wakwenza kwaba yisithombe esibunjwe njengethole esebenzisa insimbi yokukhanda. Basebesithi, “Laba yibo onkulunkulu benu, O Israyeli, abalikhupha elizweni laseGibhithe.”

5 Kwathi u-Aroni ebona lokhu wakha ialithare phambi kwethole wamemezela wathi, “Kusasa kuzakuba lomkhosi kaJehova.”

6 Ngakho ngosuku olwalandelayo abantu bavuka ekuseni kakhulu banikela umnikelo wokutshiswa, baletha lomnikelo wobudlelwano. Emva kwalokho bahlala phansi badla, banatha; basukuma bagida.

7 Lapho-ke uJehova wathi kuMosi, “Yehla uye phansi ngoba abantu bakho owabakhupha elizweni laseGibhithe sebonakele.

8 Baphangisile badela konke engabalaya khona bazenzela isithombe esibunjwe safana lethole. Basikhothamele banikela iminikelo kiso bathi, ‘Laba yibo onkulunkulu benu, bako-Israyeli, abalikhupha eGibhithe.’ ”

9 UJehova wasebuya esithi kuMosi, “Sengibabonile abantu laba; ngabantu abantamo zilukhuni. 10 Khathesike ngiyekela ngingedwa ukuze ulaka lwami lubalavukele, ngibatshabalalise.”

11 Kodwa uMosi wacela umusa kuJehova uNkulunkulu wakhe, wathi, “Awu Jehova! Kungani ulaka lwakho kumele lulavukele abantu bakho, owabakhupha eGibhithe ngamandla amakhulu langesandla esiqinileyo na?

12 Kungani amaGibhithe kumele athi, ‘Wabakhupha elizweni ngenxa yenhloso embi ukuba ababulalele ezintabeni, abakhucule baphele ebusweni bomhlaba’? Phenduka olakeni lwakho olwesabekayo, uthambise umoya wakho, ungaletheli abantu bakho ukubhujiswa. 13 Khumbula izinceku zakho u-Abrahama, lo-Isaka lo-Israyeli owafunga kubo wena ngokwakho wathi, ‘Ngizakwandisa inzalo yenu ibe ngangezinkanyezi zasemkhathini, ngiyinike lonke ilizwe engalithembisa lona ukuba libe yilifa layo kuze kube nini lanini.” ’

14 Lapho-ke uJehova waguquka ebubini ayesemise ukubehlisela ebantwini bakhe.

15 UMosi waphenduka wehla entabeni ephethe izicecedu ezimbili zamatshe obuFakazi. Ayelotshwe inxa zombili phambili langemuva. 16 Izicecedu zamatshe zazingumsebenzi kaNkulunkulu; umbhalo ungumbhalo kaNkulunkulu owawulotshwe ezicecedwini zamatshe.

17 Kwathi lapho uJoshuwa esizwa umsindo wabantu beklabalala, wathi kuMosi, “Kulokuhlokoma kwempi ezihonqweni.”

18 UMosi waphendula wathi, “Akusiyo nhlokomo yokunqoba, akusiyo nhlokomo yokwahlulwa; yinhlokomo yokuhlabela mina engiyizwayo.”

19 Kwathi uMosi esebanga ezihonqweni, ebona ithole kanye lokugida okwakusenziwa, ulaka lwakhe lwavutha, walahla amatshe ayesezandleni zakhe, ahlephuka aba yizicucu phansi kwentaba. 20 Wathatha ithole abebelenzile walitshisa emlilweni. Walichola laba yimpuphu, wayivuvuzela emanzini, wabanathisa wona aba-Israyeli.

21 Wasesithi ku-Aroni, “Abantu laba benzeni kuwe uze ubakhokhelele esonweni esikhulu kangaka na?”

22 U-Aroni waphendula wathi, “Ungathukutheli nkosi yami. Uyakwazi ukuthi abantu laba bathanda ububi. 23 Bathe kimi, ‘Senzele onkulunkulu abazahamba phambi kwethu. Umuntu lo, uMosi owasikhupha elizweni laseGibhithe, asikwazi osokwenzakale kuye.’ 24 Ngakho mina ngithe kubo, ‘Loba ngubani olomceciso wegolide kawukhuphe.’ Bangiphile-ke igolide ngaliphosa emlilweni, kwasekuphuma ithole leli.”

25 UMosi wabona ukuthi abantu babengasabambeki kanye lokuthi u-Aroni wayesebaxhwalisile baze baba yinhlekisa ezitheni zabo. 26 Ngakho wema esangweni lezihonqo wathi, “Loba ngubani ongokaJehova keze kimi.” Wonke amadodana kaLevi ayabuthana kuye.

27 Wasesithi kuwo, “Lokhu yikho okutshiwo nguJehova, uNkulunkulu ka-Israyeli, ukuthi, ‘Indoda ngayinye kayibophele inkemba yayo ngebhanti eceleni kwayo, lihambahambe phakathi kwezihonqo lisuka kwelinye icele lazo lisiya kwelinye, indoda ngayinye ibulale umfowabo, umzalwane wayo lomakhelwane wayo.” 28 Amadodana kaLevi enza njengokulaywa kwawo nguMosi. Ngakho ngalolosuku kwafa abantu ababengaba yizinkulungwane ezintathu. 29 UMosi wasesithi kubo, “Lamuhla lina selahlukaniselwe uJehova ngoba limelane lamadodana enu labafowenu, ngalokho uselibusisile lamhla.”

30 Ngelanga elalandelayo uMosi wathi ebantwini, “Lenze isono esikhulu kakhulu. Kodwa khathesi ngizaqansa ngiye phezulu kuJehova, mhlawumbe ngingenza inhlawulelo yesono senu.”

31 Ngakho uMosi wabuyela kuJehova wathi kuye, “Awu, abantu laba sebenze isono esikhulu kakhulu. Bazenzele onkulunkulu ngegolide.

32 Ake ubathethelele izono zabo – kodwa uma kungenjalo, ngesula ogwalweni olulobileyo.”

33 UJehova wamphendula uMosi wathi, “Lowo owenze isono kimi ngizamesula ogwalweni lwami. 34 Khathesi hamba, ukhokhelele abantu endaweni engakhuluma ngayo kuwe. Ingilosi yami izahamba phambi kwakho. Kodwa-ke nxa isikhathi sami sokujezisa sesifikile, ngizabajezisa ngenxa yesono sabo.”

35 UJehova wabajezisa abantu ngesifo ngenxa yalokho abakwenza ngethole elalenziwe ngu-Aroni.